(એજન્સી) તા.૮
સઉદી અરબ સરકારે હજ પર આવી રહેલા હાજીઓની સુરક્ષા અને મદદ માટે ખાસ તૈયારી કરી છે. વાર્ષિક હજયાત્રાથી એક મહિના પહેલા જિદ્દાહ શહેરમાં હજ હેકાથોનનું આયોજન કરાયું હતું. જેમાં દુનિયાભરથી કમ્પ્યૂટર પ્રોગ્રામિંગ એક્સપટ્ર્સ ખાસ કરીને મહિલાઓ પણ સામેલ થઈ હતી. તેમાં સાઉદી ફેડરેશન ફોર સાઈબર સુરક્ષા અને પ્રોગ્રામિંગ ટીમે વિજેતાઓની જાહેરાત કરી હતી. તેમાં ૫ સઉદી મહિલાઓની ટીમ તુર્જમાનને પ્રથમ ઈનામ અપાયું. તેણે એવી એપ બનાવી છે જે દુનિયાભરના હાજીઓ માટે તેમની ભાષામાં રોડ ડિરેક્શન સિગ્નલ્સ અને ટ્રાફિક નિયમનું ભાષાંતર કરી શકે છે. તમને જણાવી દઇએ કે આ ટીમને લગભગ ર૬૬૬૬૭ ડોલરનું ઇનામ મળ્યું હતું એટલે કે લગભગ એક મિલિયન જેટલા સઉદી રિયાલ. સઉદી અરબમાં હજ માટે શ્રદ્ધાળુઓનું આગમન પણ ચાલુ છે. હજ હેકાથોનમાં બીજું ઈનામ મેળવનાર ટીમે હજ વોલેટ નામની એપ તૈયાર કરી હતી. આ એપની મદદથી હજ વોલેટથી ખરીદી અને ટ્રાન્જેક્શન પર સરળતાથી કરી શકાય છે. હજ હેકાથોનમાં બે પાકિસ્તાની પ્રોફેશનલ્સે પણ ભાગ લીધો હતો. તેમણે બે પૂર્વ એશિયન વિદ્યાર્થીઓ સાથે મળીને વર્ચ્યુઅલ લીશ નામે એક એપ બનાવી હતી. આ એપથી ખોવાઈ ગયેલી વ્યક્તિની લોકેશન ટ્રેસ કરી શકાશે. જ્યારે સઉદીના જ ચાર કમ્પ્યૂટર એક્સપટ્ર્સે એક ગાર્બેજ બિન માટે એક સેન્સર ડિઝાઈન કર્યુ છે જે ભરાઈ ગયા બાદ સફાઈ માટે સિગ્નલ આપે છે. હજયાત્રાને ધ્યાનમાં રાખી સાફ સફાઈ માટે આ એપ મદદરૂપ મનાઈ રહી છે. તમને જણાવી દઇએ કે ૩ દિવસની હેકાથોન જિદ્દાહમાં ૧થી ૩ ઓગસ્ટ સુધી આયોજિત કરાઈ હતી જેમાં ૧૦૦થી વધુ દેશોની સઉદી મહિલાઓ સાથે સાથે સોફ્ટવેર ડેવલોપર્સ હાજર રહ્યા હતા. તુર્જમાન ટીમની એક સભ્ય મહિલાએ કહ્યું હતું કે અમે ખુદાની બંદગી કરીએ છીએ. ખરેખર અમે ઘણાં થાકી ગયા હતા અને ખુદાનો આભાર છે કે તેણે અમારી મહેનત સ્વીકારી અને અમે પ્રથમ ક્રમાંકે રહ્યા.