(સંવાદદાતા દ્વારા) વડોદરા, તા.૬
વાલી-વિદ્યાર્થીઓના લાખો રૂપિયા ખંખેરી માલેતુજાર થયેલા અને હાલમાં જેલવાસ ભોગવી રહેલા સુમનદીપ વિદ્યાપીઠના સર્વે સર્વાનો વધુ એક છેતરપિંડીનો કેસ બહાર આવ્યો છે. જામનગરના વિદ્યાર્થીએ સુમનદીપ ખાતે એમબીબીએસમાં એડમિશન લઈ ફી પેટે રૂા. ૧૦ લાખ ૮૬ હજાર ભર્યા હતા. ત્યારબાદ તેને અન્ય કોલેજમાં એડમિશન મળતાં ફી પરત આપવાની માગણી કરી હતી, પરંતુ વિદ્યાપીઠના સંચાલકોએ માત્ર ૮૬ હજાર પરત કરી બાકીના ૧૦ લાખ માટે થાય તે કરી લેવાનું જણાવતા વિદ્યાર્થીએ વાઘોડિયા પોલીસ મથકે ફરિયાદ નોંધાવી છે.
પોલીસ સૂત્રો દ્વારા પ્રાપ્ત વિગત અનુસાર જામનગર ખાતે રહેતા પ્રકાશભાઈ વશરામભાઈ આહિર (૩પ વર્ષ)ના નાનાભાઈ રાહુલ આહિરને એમબીબીએસમાં સુમનદીપ વિદ્યાપીઠમાં પ્રવેશ લેવાનો હોવાથી પ્રકાશ આહિરે કોલેજના સંચાલકોનો સંપર્ક કર્યો હતો. મનસુખ શાહને રૂબરૂ મળ્યા ત્યારે તેમણે તેમના પર્સનલ સેક્રેટરી પીએ વિપુલ પંડ્યાનો અને વચેટિયા દિક્ષીત શાહનો સંપર્ક કરવા કહેલું.
મનસુખ શાહ (ચેરમેન) એન.એમ.શાહ (કોલેજના રજિસ્ટ્રાર), વિપુલ પંડ્યા (પી.એ) પ્રજ્ઞેશભાઈ (પી.એ.) તથા પુત્ર દિક્ષીત મનસુખ શાહએ પ્રવેશ માટે રૂા.૧૦ લાખ ૮૬ હજાર લીધા હતા અને અન્ય કોલેજમાં એડમિશન મળશે તો પૂરેપૂરી ફી પરત કરવાનું વચન આપી વિશ્વાસ કેળવ્યો હતો. આથી ફરિયાદી પ્રકાશ આહિરે રૂા.૧૦ લાખ ૮૬ હજાર ચૂકવી દીધા હતા. ત્યારબાદ રાહુલ આહિરને કરમસદ ખાતેની પ્રમુખ સ્વામી મેડિકલ કોલેજમાં પ્રવેશ મળી જતા સુમનદીપ મેડિકલ કોલેજના સંચાલકો પાસે રૂા.૧૦ લાખ ૮૬ હજાર પરત માંગ્યા હતા પરંતુ સંચાલકોએ માત્ર રૂા.૮૬ હજારનો ચેક પોસ્ટ દ્વારા મોકલી આપ્યો હતો. પ્રકાશભાઈએ રૂા.૧૦ લાખની ઉઘરાણી કરતા સંચાલકોએ તેમને જાનથી મારી નાખવાની ધમકી આપી થાય તે કરી લેવાની ચીમકી ઉચ્ચારતા વાઘોડિયા પોલીસ મથકે ઉપરોક્ત આરોપીઓ સામે છેતરપિંડીની ફરિયાદ નોંધાવી હતી.